اقوال وايات

خليني بَس چَم لحظة

خليني بَس چَم لحظة..أصفن بوجك ياملاك

أحسّ برَوعة الخالق

للسما والأرض هداك
أخذ روحي وخَل أموت
وخليها بصبعَك ياقوت
مو كل محبَس يلوگ بالأيد
بس الي على الذهب يزيد
……….

خليني ..

أغني من گلب مَحروم
جاف ومكسور من الهموم
مثل الصحرا بعّز الصيف
تتوسل السما بمَطرة وهيف
……….

خليني…

أتمشى جوا الأمطار
وأفرش جناحي بالأفق
وأغطي كل البنات
مبدال المَطرة عطر
……….

خليني …

بالهوا طاير وياك
لأهدي الكُل نَجْم وَردة’
وللشمس عُمر وأشواگ
الگلب اليسكن بيه حَبيب
لايشوف دوا ولاطبيب
ونيران العشگ ماتخيب
ولا شمس الحب اتغيب
………..

خليني …

خليني أنزل عالأرض
وأتمشى بين الأحباب
أغطي الجبال بثلوج
وبكل سَهل أفرش مروج
……….

خليني…

خليني أصافح بأيد
والحزن أودع بأيد
وأدفن الماضي بعيد
واضوگ العمر من جديد
ولو أدري العُمر ينداس
لأجلك قلادة وألماس
…………..
خليني…
خليني بعين البحر
أسكن وأصد أمواجه
واتحدى كل الحيتان
واگبر القرش وتاجه

المقدسي
نهاد حناني

عن نهاد حناني

نهاد حناني