كياسا – ترتيلة

الشمامسة: تقال في البدايـة

كـود مـارن إريلـي صلولــي تـري مَشِـلْخـانـي مـوثيلَــيْ
مـْيَمْنـي وْچپـي مْتـولـيـلـي ولصليـــوا كِمْبَصمـريـلــي

آن يـوذايـي گـاپــــــوري ليشـوع مْشـيحــا نــــكاري
پشْـلَـيْ بْـكـاوي مَسْـخــوري شـوقلـي أَقـلاثـي مبـوصِمـْري

گـما گـروانـي مْبـوسِـملــي وْميثـي مْـقـورا مـوقِمْلــــي
خـيلـوخْ إديـو مـوخـويـلـي پـغـروخْ مـن صليـوا شـريلـي

دومـاخـوس مْچپـي ويــــوا آهـو بـإيشـــوع گـاپـــروا
خيــلا منـي كـطــالبـــوا دمْخـالصْلـــي آمِــــــرْوا

ططـوس دويـوا مـن يَمْنـــي ميـري دون ديـنـي كـينــــي
بِـعْـواذَنْ پشـلَـنْ دينــــي ظـلِمْلَـنْ سـنيقـي وكـپينــــي

إيشـوع مـاخـربـوثـا وذلـي بْـأَنْ إيمـا بشـتـا پـلخـلــــي
گيــادوخْ ميثـي مـوقمْلـــي خيلـي وعَجِـبْـواثـا وذلـــــي

ططـوس صوبْ مـارَنْ پـثـلـي منـي طْـلبلـي ومُـرْجيـلــــي
لأنـي مَلكــوثـا مخشـخـلـي عـودوخْ بـكـاوا تخـرتـلـــي

قـولـوخْ سي رخـوشْ قَـلـولا صليـوا شـقـولْ طـالـوخْ قـذيـلا
كـنثـا قـامـوخْ بپثخيــــلا ورومحـا دنـورا مْطـاشـيــــلا

گيّـاسـا صلـــيـوا شـقلـي وألـدْ پــرْدَيْســــا زلــــي
بِـمْطيتَـيْ كْــروا شـميلــي وبكــاو طـرآ كِمّـكْـليـلــــي

1- م: مـوري مَـنْ كِمْشـاديـروخْ أورخـا مـَنْ كِمخَـويـلـــوخْ
ليمـا سَبَبْ كِمْبـاقـذ لــوخْ لأذْ أَثْـرَنْ كِـمْ مَـدشْـلـــوخْ
ك: شْموءْ إلّـي بِـدْ أَمْـرنّـوخْ مْطـاشي رومْحـوخْ بشـوقنـوخْ
رَحمـي طْلبْلـي مِنْ سْتـاذوخْ بشْـلـي مْشـودرا هـول كيبـوخْ

2- م: بـگـو إيمـا خيـلا ثـيلـوخْ لأثـرا مَـزدْآنـا إويـــــروخْ
يامـا دْنـورا ديّـوخْ فتْـلـوخْ إويـروخْ لـگنْثـا ولا زْديــلـوخْ
ك: بْـقوّوتـا دإيشـوعْ ثيـلــي بكـو خيـلـِه لآخـا مْطـيـلــي
بأورْخـا مْچـوخـا ولا زديلـي لـگنثـا بْـثـوخْ ميـري طـالـي

3- م: آيـتْ مَشـلخـانـايـــوتْ لپـَردَيْسـا ثيـلـوخْ دْكَـنْـــوتْ
كْـبـائـنْ قَلـــولا ددأرِتْ وإن لا كـيـانـوخْ بْـمَقـطْـلــتْ
ك: نَعـم مَشـلْخـانـايـــونْ بَـل داهـــا مْـپـوچـمْنيـــوِنْ
ولا ثـيلـي لآخـا دْكَـنْـوِنْ قـذيـــــلا إِتّـي تَـــدْ أورِنْ

4- م: اَثـرَنْ لا كـبـايشْ ديشـــا شـورن نـورايـلـي لـويشــــا
نـاطـورا دايـمْ رْإيشــــا لا كْشــاوِقْ دآورْ نـاشــــــا
ك: أَثـروخْ مَـزدآ نــا ويــوا مْـقَـمْ دسْـتـاذوخْ صَلْـويـــوا
وْپـغـره بـقيسـا مْتـلتيـوا ورومـحـا بْـدبنـهْ خـرزيـــوا

5- م: مْگـود آذم مْگنثــا نپقـلــي نـاشـا لآخـا لا ثـيـلــــــي
كـنسـا مْـگـنثــا طْريذيلـي داورت شــولا زَحْـمـيـلـــي
ك: مـنْ كـود آذم حْـطـيـوالـي سـتـاذوخْ لكنْسَنْ حْمِصْـوالـــي
إديـو إِمَّـنْ مْصـولحْــلــي تَـرآ لازم د پَـثـختــــــــي

6- م: خـا گـورا يـوتْ حَطّــايــا وچَـپـَل وكَبـيـرا مْطـوميـــا
شْـبخـلـوخْ لـدمّـا زَكّـايــا داورتْ لـكنثــا لـكـْبَـرْيـــا
ك: گـلـزمـا دآذي دَيـذ تـــــا إيشـوعْ دَصليـوا بگـاغـولتـــا
كـمْخَللـنْ مِـنْ خـطيثــــا آهـو مـيـري أورْ لـگنْـثــــا

7- م: أمـوخْ گـورا لاكِـمْجَحْـــدِنْ وآ نـا هـاذاخْ بْـقيـذايـــــونْ
هيـلانـا دخـايـي دنـطْــرِنْ وْقَـرْوِتْ إ لّــهْ لاكشـوقـِـــنْ
ك: سي يـاگـروا لگـاغـولـتــا خْـزيـلا إيـلانـا دْگِـنْثـــــا
بشـوقـِنْ بـگـو سـانـايـوثـا دؤورِنْ بـكـو بسْـتـاهـوتـــا

8- م: آذم وْحَــوا گْـثـوالــــي وَراقـا مْـقـودِمْـوالـــــي
گـودْ مِـنْ آخـا نْـبِقـوالــي گْيـانَـيْ بقَصـاصْ دْريـوالـي
ك: يـاگـروا ديــنـا بـريلــي مْشـيحــا بْـدِمّـهْ مخـللــي
اي وَراقَـيْ شـقيـلالـــــي بگـو صليــوا مْعُـلقـالــي

9- م: إ يّـوتـنْ طـريـذي مْگِـنْثــا دأورِتْ ليـلا بْـريثــــــا
هـولا رُمْحـا مُحْضَـرْتــــا لكُـلْ دْپـاسي خـذا پِسـوثــا
ك: طريـذا لبيث بـابـا ثيـلــي شـيفانـا طـاوا نْبِقلـــــي
أو إرْبـا مْسـوگـرا خـزيلـي لروشـهْ طنـي ومـوثيـلــي

10-م: نـبقلـي آذام بْـگـرْيـوثــا ولادإيـري إلّـدْ كـِنْثـــــا
أديـو شـولايـلـي خـاثــا دأورت آيتْ بْـقـميـثـــــا
ك: سـتـاذوخْ أَذ شـولا وِذلــي آذم ياسـيـرا شـريلـــــي
نـاشي دايشـول مْبـولطلــي ميري سي طـرآ بْثـوخـلــي

11-م: إيـذولـي دْمَـلاخـايـــونْ مـنْ چـوخـا قـَطْ لاكــزَدأنْ
وآيِتْ مـاقــا كِمْجَســرِتْ يـابـردْ آذمْ مْـؤبْـريـــوِتْ
ك: لاقَلقـِتْ شمـوؤ دَأمـْرِنّـوخْ بيـد سـتاذيـلـي بيـريــوخ
حُكمى لعـل منـي ومـنـوخ وأخنـي كـولانْ مَخْـواثــوخْ

12-م: لـيبـوخْ اورتْ لأَذ أَثــــرا مْشـوبْحيلـي مْـزويحـا مْيوقـرا
نـورا خَـوذرانِـه كخَـــذرا رومحــا قـمْتـا بـنْطـــارا
ك: آخـا ليبــوخْ دمـَنْعـتـــي ولأوارا لا كشـوقـتــــــي
وبَـرْدَيْســا هَـم پـثـختــا ورومحـوخْ وْحَرْبـوخْ بطاوختـا

13-م: لاشميـلـوخْ مِـنْ قـرْيـانــا كـرويـه وسـيبـه مَـزِدْآ نـــا
كـنَطْـري لكـِنْثـا مـأرآ نــا دلا أويـري جـو زونــــــا
ك: لاشـميلـوخْ مِـن كـليـانــا شْـقلّـي بَـغـرا مَحْيـانــــا
بشلـي لآذام مْـخَلصـانــــا ولـبَـردَيْسـا مَـدأرا نـــــا

14-م: رومْحـــا دنـورا دكخَــذرا وبـردَيْسـا دايـمْ كـنـطـــرا
قـم آذم بشـلــي شــــورا بَس مْقـَدمتْ بـلبـــوخْ بـأورا
ك: إتّـي نيشَـنْ دسْـتـــــاذوخْ بْكـاوي بـدْ تـورنْ رومْحــوخْ
وإن بـئيـلـوخْ وإنْ لاَبـْئيلــوخْ أَخنـي لبَـرْدَيْســا بـــاوروخْ

15-م: هـولَـيْ آخـا روحـانــــي إلي صـرابـــي شـميـانـــي
طـئنـي سـيپـي نـورانــي ديـخ تـد مجَسـري أوپـرانـــي
ك: أنْ صـرابـي وأنْ روحـانــي وأَنْ كـروي مَـزدآنــــــي
كـود خـازي صليــوا بـأينـي إلِّـي بـهـاوي مـيقـرانـــي

16-م: ريشْ طـرونس أَومَـحْيـانــا هولـي نيشَنْ دمْخَلصـانـــــا
ديـخْ كـامرت يـا روحـانــا لاذ نيشـَنْ هـووت طـإينــــا
ك: شـوحـا علـويـا بكو شـمَيّـا صليـوا بْكـاغـولتــا تليــــا
كثـولـي بْـدمي زَكيـايـــا لآذم حنـي بــارويــــــــا

17-م: كـورا دذمــا لمـاثيـلــوخْ ولآخـا مـن كمشـاديـــــروخْ
وأثـرَنْ دَدْيشـتـي ليبـــوخْ وتـرآ مـن پـاثِـخ طـالــــوخْ
ك: لا شَخشت يـا روحـانــــا ولا قَـلقِتْ يـا نـورانـــــــا
شقـلـي منّـوخْ شُـلطـانــا خـورْ بصْليــوا مَحْيــانــــا

18-م: صليـوا دإيشـوع مـوثيلــوخْ رشْ ريشي وإينـي ثيـلـــــوخْ
إوور لكنْـثــا ولا كمَنْعنّـــوخْ تَـرآ بـثيخيـلـي قـامــــوخ

تقال بعد الكياسة

1- صليــوا ديشــوع مَحْيـانــا بينـاثَـنْ دْريـلـي شـلامــــا
أورخـا دكِـنْثـا مْـأذ زَونـــا لـكبطـلا بكــل عـدانـــــا

2- أذ قـيـامْتـا بـرختـا لـكولان أنْ ديـوَخْـوا طـريـذي مـأَثـرَنْ
هَـمْ كـروي پصخلَـيْ إمَّــنْ دْمَـرْيـا مصـولحلــــي إمَّـنْ

3- إو لـحَنينـوثــي رَپْـثــــا إوذلـي مَـرْيـا بـكـاو بـريثــا
كـم مَـدئيـرَنْ كـا خـرثـــا آدم مـن بيـرشْ لـكنـثــــــا

4- حـنينـوثــي رابـيـلــــي رَحْمـي ديـي شـپيخـايلـــي
أرآنـي بصخـلـي ورْوِزْلَـــيْ دإمـد روحـانــي خـوخلــي

5- طالـوخْ شُـكـر وتشـبُحْتــــا يـابـارويـــا دبـريـاثـــا
دأوذلــوخْ مـرحْمـانـوثــــا لآدم دمـأويـروخْ لـكنـْثــــا

6- شـوحـا وتشـبحتــا طـالـوخْ دكـنثـا لـكيّـاسـا ولــــوخْ
ورحمـي رابـي دأوذلــــوخْ دآدم لأثــرا مـدإيـــــروخْ

عن ادارة الموقع

شاهد أيضاً

الجمعة الثانية زمن الدنح…تذكار الرسولين مار بطرس ومار بولس

2 ملوك 4: 8-37وفي أحد الأيام عبر أليشع إلى شونم وكان هناك امرأة غنية فدعته …